اقوام متحدہ۔15مارچ (اے پی پی):پاکستان دے وزیر خارجہ شاہ محمود قریشی اقوام متحدہ دے سیکرٹری جنرل اتے سلامتی کونسل دی صدرکوں لکھیے ڳئے ھک خط اچ بھارت توں 9مارچ کوں پاکستان اچ بھارتی سپرسونک میزائل ڈھݨ دے واقعے دی مشترکہ تحقیقات دا مطالبہ کیتے تے بھارت دی طرفوں ایں واقعہ دی اپݨے تئیں تحقیقات کوں مسترد کرݙتے ۔ اے خط2ایجنڈا دے تحت سلامتی کونسل دے سارے ارکان اچ سرکاری دستاویز دے طور تے ݙو ایجنڈا آئٹم دے طور تے تقسیم کیتا ڳئے ، پہلا ایجنڈا آئٹم ’’امن و سلامتی کوں برقرار رکھݨ اچ سلامتی کونسل دی ذمہ واری اتے ݙوجھا ایجنڈا آئٹم انڈیا پاکستان کوئسچن اے ۔ وزیر خارجہ شاہ محمود قریشی اقوام متحدہ دی سلامتی کونسل دی اڄوکے مہینے (مارچ کیتے)صدرومتحدہ عرب امارات دی سفیر لانا زکی نصیبہ تے اقوام متحدہ دے سیکرٹری جنرل انتونیو گوتریش کوں لکھیے ڳئے خط اچ بھارت دی طرفوں پاکستانی فضائی حدود دی خلاف ورزی تے تشویش دا اظہار کریندے ہوئیں مطالبہ کیتے جو بھارتی حکام دی طرفوں پیش کیتی ڳئی سادہ وضاحت دے نال ایں طرح دے سنگین معاملے کوں حل کیتا ونڄ سڳدا ۔انہاں آکھیے پاکستان اپݨی فضائی حدود دی ایں سخت خلاف ورزی جیڑھی جو بین الاقوامی ایوی ایشن سیفٹی پروٹوکول دی وی خلاف ورزی اے، دی شدید مذمت کریندے۔
