بیجنگ۔16مئی (اے پی پی) پاکستان اتے چین توانائی، بینکنگ اتے مالیاتی شعبیاں اچ تعاون کوں مضبوط ٻݨاوݨ، رابطیاں دے مںصوبے تے پیشرفت کوں تیز کرݨ دے نال نال اعلیٰ معیار دے بیلٹ اینڈ روڈ تعاون دی حمایت کرݨ اتے ’’اپ گریڈ ورژن‘‘ ٻݨاوݨ کیتے سانجھی کوششاں تے اتفاق کیتے۔ بیجنگ اچ تھیوݨ آلے پاک چین وزرائے خارجہ سٹریٹجک ڈائیلاگ دے پنجویں دور اچ چین پاکستان اقتصادی راہداری سودھے ݙوپاسہ تعلقات اتے تعاون تے ڳالھ مہاڑ کیتی ڳئی۔ خمیس کوں دفترخارجہ توں جاری بیان موجب نائب وزیراعظم اتے وزیر خارجہ سینیٹر محمد اسحاق ڈار اتے چینی وزیر خارجہ وانگ یی اجلاس دی سانجھی صدارت کیتے۔ ڳالھ مہاڑ اچ فریقین سٹریٹجک، اقتصادی، سیاسی، دفاعی اتے سلامتی، تجارت، سرمایہ کاری، ثقافتی اتے عوام توں عوام دے ڈومینز اچ ݙوپاسہ تعلقات دے سارے شعبیاں تے ڳالھ مہاڑ کیتی۔ تقریب دے بعد جاری سانجھے بیان موجب سانجھی دلچسپی دے بین الاقوامی اتے علاقائی معاملیاں تے وی ڳالھ مہاڑ کیتی ڳئی۔
