راولپنڈی ۔15دسمبر(اے پی پی):پاک فوج دے سربراہ جنرل سید عاصم منیر دورہ امریکہ اچ امریکہ دے حکومتی اتے فوجی حکام نال ملاقاتاں کیتن جیں اچ ݙو پاسے دلچسپی دے امور، عالمی اتے علاقائی سلامتی تے جاری جھیڑیں تے ڳالھ مہاڑ کیتی ڳئی اے ۔ ݙوہیں فریقاں سانجھے مفادات گھنݨ اچ ݙو پاسے تعاون دے ممکنہ موقع ڳولݨ سانڳے رابطہ جاری رکھݨ تے اتفاق کیتے ۔ آئی ایس پی آرتوں جاری بیان موجب جاری دورہ امریکہ اچ آرمی چیف جنرل سید عاصم منیر امریکی وزیر خارجہ انٹونی بلنکن، سیکرٹری دفاع جنرل لائیڈ جے آسٹن ، نائب امریکی وزیرِ خارجہ وکٹوریہ نولینڈ، نائب قومی سلامتی مشیر جوناتھن فائنرتے امریکی چیئرمین جوائنٹ چیفس آف سٹاف جنرل چارلس کیو براؤن نال انڄ انڄ ملاقاتاں کیتن ۔ ملاقاتاں اچ انسداد دہشت گردی دے شعبے اچ تعاون تے دفاعی اشتراک کارکوں سانجھے تعاون دی بنیادقرار ݙتا ڳئے۔ ݙوہیں فریقاں ڳالھ مہاڑ کوں ودھاوݨ تے سانجھے فیدہ مند رابطے ودھاوݨ دے طریقے ڳولݨ دے عزم دا اعادہ کیتے ۔آرمی چیف علاقائی سلامتی دے مسئلیں تے جنوبی ایشیا اچ سٹریٹجک استحکام کوں متاثر کرݨ آلی پیشرفت تے ھک ݙوجھے دے نقطہ نظر کوں سمجھݨ دی اہمیت تے زور ݙتا ۔ ایں تناظر اچ آرمی چیف مسئلہ کشمیر کوں بین الاقوامی قانون اتے اقوام متحدہ دی جنرل اسمبلی دی قرارداداں دے مطابق حل کرݨ دی اہمیت کوں اجاگر کیتے ۔ آرمی چیف اتھاں پاکستانی تارکین وطن نال وی ڳالھ مہاڑ کیتی ۔ امریکہ اچ پاکستانی سفارتخانے دے زیر اہتمام استقبالیہ اچ آرمی چیف پاکستانی برادری دے ارکان نال ملاقات کیتی ۔ آرمی چیف ٻاہرلے ملک رہݨ آلے پاکستانی برادری دی طرفوں ملک دی ترقی سانڳے مثبت کردار کوں چنڳاں آکھیےڳالھ مہاڑ اچ مختلف جہتاں دے موضوعات تے ڳالھ مہاڑ تھئی تے آرمی چیف پاکستانی تارکین وطن دیاں کوششاں دی تعریف کیتی۔ انہاں ایس آئی ایف سی دے ذریعے سرمایہ کاری کرݨ کیتے تارکین وطن دا خیرمقدم اتےحوصلہ افزائی وی کیتی جیڑھے جو پہلے ہی مختلف جہتاں اچ کامیابیاں گھندی پئی اے ۔آرمی چیف ایں ڳالھ تے وی روشنی پاتی جو امریکہ پاکستان سانڳے ساریں تں وݙی برآمدی منڈی اے جیڑھی جو ساݙی کل برآمدات دا 21.5 فیصد اے ۔انہاں سپیشل سکریننگ ، ویزیں توں انکار اتے روکیے ونڄݨ متعلق افواہیں کوں رد کرݙتا ۔آرمی چیف آکھیے پوری دنیااچ رہݨ آلے پاکستانیاں کوں عزت دی نگاہ نال ݙٹھا ویندے کیوں جو او پاکستان دے سفیر ہن تے مختلف شعبیں اچ پاکستان کیتے اہم کردار ادا کریندن ۔پاکستانی برادری دے ارکان پاکستان دی بہتری سانڳے پاک فوج دے کردار اتے شراکت تے فخر دا اظہار کیتے۔ آرمی چیف پوری پاکستانی برادری کوں انہاں دیاں کوششاں تے نیک خواہشات دا اظہار کیتے۔ انہاں تنویر احمد نال وی ملاقات کیتی جنہاں پاکستان اچ آئی ٹی دی ترقی دے شعبے نسٹ کیتے 9ملین ڈالر دا عطیہ ݙتا ہئی ۔ آرمی چیف انہاں دی تعریف کیتی تے آکھیے جو پاکستان کوں انہاں جیہے ہیروز تے فخر اے ۔
