اسلام آباد۔ 26 اکتوبر(اے پی پی)سپریم کورٹ چیئرمین پی ٹی آئی عمران خان دے لانگ مارچ دے اعلان تے امتناع جاری کرݨ دی حکومتی درخواست مسترد کرݙتی اے جݙاں جو توہین عدالت دی درخواست تے عمران خان کوں نوٹس جاری کرݙتے۔ ایڈیشنل اٹارنی جنرل عامر رحمن ݙسایا جو پولیس اتے حساس اداریاں دی رپورٹس دا جائزہ ڳھدا ویندا پئے۔ عدالت آکھیا جو عمران خان ڈی چوک آوݨ دی کال کݙاں ݙتی ہئی، عدالتی حکم 25 مئی کوں شام 6 وڄے آیا ہا، عمران خان 6 وڄ تے 50 منٹ تے ڈی چوک دا اعلان کیتا ہا، عمران خان ݙوڄھا اعلان 9 وڄ تے 54 منٹ تے کیتے۔ ایڈیشنل اٹارنی جنرل آکھیا جو عمران خان ڈی چوک دی کال ݙتی ہئی جیڑھا توہین عدالت اے، عمران خان مختص ڄاہ توں اڳو آئن اتے ریل مکائی۔ چیف جسٹس آکھیا جو یقین دہانی عمران خان ولوں وکیلاں ݙتی ہئی، ݙیکھݨا ہوسی جو عمران خان آ تے واضح کرن جو احتجاج بارے کئیں کیا آکھیا ہا۔ نوٹس اچ یقین دہانی دی ڳالھ اے ٻھل تحریری طور تے کتھاں اے؟ مناسب ہوسی جو حکومتی الزامات تے یقین دہانی کراوݨ آلیاں توں ولدا منڳ ڳھنو، اساں سرخیاں نئیں ٻݨاوݨ چاہندے، قانون دی حکمرانی چاہندے ہیں، سول نوعیت دی توہین عدالت اچ شوکاز تے ہی پیش تھیوݨا پوندے۔ بعد اچ عدالت عمران خان کوں توہین عدالت کیس اچ ولدے کیتے نوٹس جاری کر ݙتے اتے چیئرمین پی ٹی آئی ولوں جمعہ کوں لانگ مارچ دے اعلان تے نوٹس جاری کرݨ دی استدعا مسترد کر ݙتی جو پہلے عمران خان دا ولدا آ ونڄے ول جائزہ ڳھنسوں کہ توہین عدالت تھئی یا نئیں، جائزہ ڳھنسوں جو یقین دہانی ڈی چوک نہ آوݨ دی کرائی گئی ہئی یا نئیں، حکومتی الزامات تے وی عمران خان دا موقف سݨݨا چاہیدے، احتجاج ہر کہیں دا حق اے، حفاظتی اقدامات حکومت دا کام اے او کرے، اپنے قلم کوں چھڑی نہ ٻݨیسوں۔
