اسلام آباد۔13جولائی (اے پی پی):وزارت مذہبی امور وبین المذاہب ہم آہنگی گستاخانہ اتے نازیبا مواد دے حوالے نال سوشل میڈیا دے مجرمانہ استعمال کوں روکݨ بارے مناسب آگاہی دی لوڑھ کوں اجاگر کریندے ہوئیں ایں امر تے زور ݙتے جو معاشرے دے سارے طبقے بالخصوص ، علماء کرام، اساتذہ، صحافی، وکلا ، تاجر ، سیاسی و سماجی رہنما تے ادارے وطن عزیز اچ گستاخانہ مواد روکݨ دی مہم اچ آپݨا ذمہ دارانہ کردار ادا کریسن، ایجھے مواد دے انسداد کیتے ہر حالت اچ قانون دا رستہ چݨدے ہوئیں ایف آئی اے سائبر کرائم دے متعلقہ تھاݨے اچ رپورٹ درج کرائی ونڄے۔ وزارت مذہبی امور دی طرفوں جاری تفصیلات موجب شر پسند عناصر گزریل کئی سال توں ساݙی نینگر نسل دے اخلاق، کردار اتے عقائد کوں تباہ کرݨ کیتے سوشل میڈیا دے ذریعے ھک منظم مہم شروع کر رکھی اے۔ساݙے معاشرہ اچ سوشل میڈیا دے منفی اتے مضر اثرات دا سرایت کرݨ پوری قوم کیتے لمحہ فکریہ اے بے حیائی بذات خود ناقابل برداشت اے لیکن ہݨ معاملہ توہین تئیں ونڄ پڄےجیڑھا جو ٻہوں سنگین صورت حال اے۔ وزارت موجب وطن عزیز اچ منظم طریقے نال سوشل میڈیا دے ذریعے اللہ رب العزت، رسول اکرمﷺ ،اہل بیت اطہار ، امہات المومنینؓ ،اصحاب رسول ؓ، قر آن پاک اتے قومی پرچم دی توہین کیتی ویندی پئی اے ، مقدس ترین شخصیات دے ناں ٻہوں توہین آمیز انداز اچ شائع کیتے ویندن ، ایں حوالے نال تصویراں تے وڈیوز بݨدن جنہاں کوں مخصوص ایپس تے اتے مخصوص گروپاں اچ شئیر کیتا ویندے ۔وزارت مذہبی امور موجب ایں حوالے نال ایف آئی اے سائبر کرائم انہان جرائم اچ ملوث ہݨ تئیں جنہاں لوکاں کوں گرفتار کیتے ، انہاں اچ ڈاکٹرز، پروفیسرز، انجینیرز، چارٹرڈ اکاؤنٹنٹ ، وکیل اتے مختلف شعبہ ہائے زندگی توں تعلق رکھݨ آلے لوک موجود ہن ۔ ایف آئی اے سائبر کرائم ہݨ تئیں 140 لوکاں کوں گرفتار کیتے جنہاں اچوں 11 لوکاں کوں ہݨ تئیں ٹرائل کورٹ سزائے موت دا فیصلہ سݨا چکی اے ۔ 2 لوکاں دی سزائے موت ہائی کورٹ توں وی کنفرم تھی چکی اے ۔ پورے ملک اچ ایف آئی اے سائبر کرائم دے 15 تھاݨے ہن، انہاں سارے تھاݨیں اچ بلاسفیمی سیل قائم تھی چکئن ۔ وزارت مذہبی امور اپیل کیتی جو جتھاں وی سوشل میڈیا تے گستاخی دا مواد نظر آوے تاں ایف آئی اے سائبر کرائم دے متعلقہ تھاݨے اچ رپورٹ درج کراون ۔ سارے تھاݨے اچ بلاسفیمی سیل ایکٹو ہن اتے ایجھی درخواست تے فوری کاروائی کیتی ویندی اے ۔گستاخی کرݨ آلا مجرم کوئی وی ایپ استعمال کریندا پیا ہووے کہیں وی ویب سائیٹ تے گستاخانہ مواد شئیر کریندا پیا ہووے یا کوئی وی پی این استعمال کریندا پیا ہووے اینکوں سائبر کرائم ٹیکنالوجی دے ذریعے ٹریس کریندی اے تے اینکوں گرفتار کرتے قانون دے مطابق کاروائی کیتی ویندی اے ، جے ایں سلسلے اچ کوئی رکاوٹ یا اوکھ پیش آوے تاں ایف آئی اے کوں قانونی کاروائی کیتے 111345786 -051 نمبر تے شکایت درج کروائی ونڄ سڳدی اے جݙاں جو گستاخانہ مواد کوں بلاک کراوݨ کیتے پی ٹی اے/ایف آئی اے نال https://complaint.pta.gov.pk/[email protected] لنک تے رابطہ کیتا ونڄ سڳدے ۔
