اسلام آباد۔25جون(اے پی پی):وفاقی وزیر اطلاعات و نشریات مریم اورنگزیب آکھیے جو سابق دور اچ پی ٹی وی تے کرکٹ رائٹس دے ناں تے ڈاکہ ماریا ڳئے، اے آر وائے کوں کرکٹ حقوق ݙیواݨ کیتے سنگین خلاف ورزیاں کریندے رولز بدلیے ڳین، عمران خان دے آکھݨ تے سابق وزیر اطلاعات فواد چوہدری پی ٹی وی کوں نقصان پچاوݨ کیتے سہولت کار ٻݨیے رہین۔ اے ڳالھ انہاں اسلام آباد اچ پریس کانفرنس کریندے آکھی۔ انہاں آکھیا جو پی ٹی وی تے حملہ کرݨ آلیاں حکومت اچ آ تے پی ٹی وی دا معاشی قتل کیتے، سوچی سمجھی سازش نال پی ٹی وی دے حقوق غیر قانونی طور تے کہیں بئے چینل کوں ݙتن، ڄݙاں ”اے سپورٹس”کوں کرکٹ دے حقوق ݙتن تاں اوندے کولو لائسنس ہی کائنا، ایندے نال پی ٹی وی کوں ہݨ تئیں 52 کروڑ دا نقصان تھی چکیے، اتے پی ٹی وی کوں سپورٹس ریونیو توں محروم کیتا ڳئے۔ انہاں آکھیے جو قومی مفاد تے سمجھوتہ نہ تھیوݨ فیسوں اتے پی ٹی وی کوں ایندا حق ولا ݙویسوں۔
