اسلام آباد۔13جون (اے پی پی):وفاقی وزیر اطلاعات و نشریات مریم اورنگزیب موجودہ حکومت دی طرفوں گھیو دیاں قیمتاں 250 روپے گھٹ کرݨ دا اعلان کریندے ہوئیں آکھیے جو پورے ملک دے سارے یوٹیلٹی اسٹورز تے گھیو 300 اچ روپے سیر دستیاب ہوسی ، سستا اٹا سکیم دے تحت پورے ملک دے یوٹیلٹی اسٹورز تے10 کلو اٹے دا تھیلا 400 روپے اچ ݙتا ویندا پئے ، 2018ء اچ اٹے دی قیمت 35 روپے فی کلو ہئی جیڑھی جو پچھلے چار سال اچ 90 روپے توں 100 روپے سیر تے گھیو 550 روپے توں 600 روپے سیر وکدا رہیا ، پچھلی حکومت چار سال اچ مافیا تے کارٹلز دیاں جیباں بھریاں ، عوام کوں مہانگ دی چکی اچ پینٹھا ڳیا ، ایہا وجہ اے جو موجودہ حکومت عوام کوں مہانگ دے اثرات توں محفوظ رکھݨ کیتے سبسڈی تے ریلیف ݙیوݨ دے اقدامات کریندی پئی اے ، پریس کانفرنس توں خطاب کریندے ہوئیں وفاقی وزیر اطلاعات آکھیے جو وزیراعظم دی سستا اٹا سکیم دے بعد ملک اچ سستا گھیو سکیم شروع کیتی ویندی پئی اے ، انہاں آکھیے یوٹیلٹی سٹورز سودھے پورے ملک اچ اٹے دی کوالٹی تے وی سمجھوتہ کیتا ڳئے ، اٹا تے کھنڈ سمگل تھئے ، انہاں کوں برآمد کیتا ڳیا تے قلت پیدا کرتے قیمت ودھائی ڳئی تے ول درآمد کیتا ڳیا ۔ انہاں آکھیے جو وزیراعظم شہباز شریف مہانگ دی ودھدی شرح کوں سامݨے رکھیندے ہوئیں یوٹیلٹی سٹورز تے آٹے دی قیمت 400 روپے 10 سیر مقرر کیتی اے ، انہاں آکھیے یکم جون 2022ء توں خیبر پختونخوا اچ یوٹیلٹی اسٹورز دے ذریعے اٹے دی قیمت 400 روپے 10 سیر ݙیوݨ دا منصوبہ شروع تھئے ۔ خیبر پختونخوا اچ یوٹیلٹی سٹورز دی تعداد گھٹ ہووݨ پاروں اتھان 6 جون 2022ء توں 100 موبائل یوٹیلٹی اسٹورز دے یونٹ شامل کیتے ڳئن جنہاں دے ذریعے خیبر پختونخوا دے لوکاں کوں سستا اٹا ݙتا ویندا پئے ، انہاں آکھیے 9 جون کوں وختی یوٹیلٹی اسٹورز دے اضافی 500 پوائنٹس اٹے دی ترسیل کیتے مختص کیتے ڳئن اڄ انہاں اچ مزید 100 پوائنٹس شامل کیتے ڳئن ۔ انہاں ݙسائے ایں طرح تقریباً 700 موبائل وینز اتے 600 پوائنٹس تے اٹے دا 10 سیر دا تھیلا 400 روپے اچ ݙتا ویندا پئے ۔ انہاں آکھیے ایں ویلھے تئیں 600 سیلز پوائنٹس تے 2 لکھ 62 ہزار 434 اٹے دے 10 کلو دے تھیلے ݙتے ڳئن ۔ وفاقی وزیر اطلاعات آکھیے جو یوٹیلٹی اسٹیشنری پوائنٹس یا موبائل وینز جیڑھے علاقیں اچ نی پڄدیاں پیاں ، ایں ضمن اچ عوام دی سوکھ کیتے ٹال فری نمبر 080005590 مقرر کیتا ڳئے جیں تے عوام آپݨی شکایت درج کروا سڳدن ۔ ایں توں انڄ اٹےدے معیار یا قیمتاں اچ فرق دے حوالے نال شکایتاں ایں نمبر 051111123570 تے کروائیاں ونڄ سڳدن ۔ وفاقی وزیر اطلاعات گھیو دیاں قیمتاں دے حوالے نال ݙسائے جو 2018ء اچ مسلم لیگ (ن) دے دور اچ ھک سیر گھیو دی قیمت 150 روپے ہئی ، پچھلے چار سال اچ گھیو 550 روپے توں 600 روپے دے درمیان فی سیر وکدا رہیا انہاں آکھیے جو 9 جون کوں گھیو دی مد اچ سبسڈی دا آغاز کیتا ڳئے جیںدا مجموعی حجم 3 ارب روپے ہے۔ انہاں آکھیے گھیو دی قیمت مارکیٹ اچ 550 روپے سیر تئیں پڄ ڳئی اے ، حکومت یوٹیلٹی اسٹورز تے 250 روپے دی سبسڈی ݙے تے گھیو دی قیمت 300 روپے فی سیر کرݙتی اے ،وفاقی وزیر اطلاعات آکھیے جو یوٹیلٹی اسٹورز اچ اٹا ، کھنڈ تے ٻیاں چیزاں گھٹ ہووݨ دی شکایتاں کیتے مانیٹرنگ نظام قائم کیتا ڳئے ، پرائس کنٹرول کمیٹیاں وی بݨائیاں ڳئن ذخیرہ اندوزی سودھے یوٹیلٹی اسٹورزتے وکݨ آلے اٹے کھنڈ گھیو کوں ٻہر مارکیٹ اچ مہانگا ویچݨ دے معاملات دی نگرانی کریسن ۔ ایں توں انڄ کمیٹیاں سمگلنگ دی وی نگرانی کریسن ۔ مانیٹرنگ کمیٹیاں چیف سیکریٹریز کوں اپ ڈیٹ ݙیندن تے وزیراعظم ہر ہفتے ایں حوالے نال اجلاس منعقد کریندن جیں اچ فوڈ سیکورٹی اتے صنعت دے وزراء سودھے صوبائی چیف سیکریٹریز وی شرکت کریندن ۔ وفاقی وزیر اطلاعات آکھیے عوام جے یوٹیلٹی اسٹورز تے قیمتاں اچ فرق ݙیکھن یا یا مذکورہ چیزاں دستیاب کائنی تاں ٹال فری نمبر تے اطلاع ݙتی ونڄ سڳدی اے۔
