اسلام آباد۔12ستمبر (اے پی پی) صدر مملکت ڈاکٹر عارف علوی کساناں کوں فصلاں دی تباہی اتے آفات پاروں تھیوݨ آلے نقصان توں بچاوݨ کیتے فصلاں دی انشورنس تے زور ݙیندیں ہوئیں آکھیا جو عالمی حدت اتے اڄوکے چھل دے تناظر اچ کسان دوست فصل انشورنس نظام متعارف کرݨا پوسی۔ ایوان صدر دے پریس ونگ توں جاری بیان موجب اے ڳالھیں انہاں سنوار کوں اتھاں فصلاں دی انشورنس بارے تھیوݨ آلے اجلاس توں خطاب کریندیں ہوئیں آکھی۔ اجلاس اچ سینیٹر ثانیہ نشتر اتے وزیر زراعت پنجاب سید حسین جہانیاں گردیزی، وفاقی انشورنس محتسب ڈاکٹر محمد خاور جمیل اتے انشورنس کمپنیاں دے سینئر ایگزیکٹوز وی شرکت کیتی۔ صدرمملکت آکھیا جو ملک دےز رعی شعبے کوں بچاوݨ اتے موسمیاتی تبدیلی دے منفی اثرات کوں ڳھٹ کرݨ کیتے جامع اقدامات ترجیحی بنیاداں تے اپنائے ونجن۔ انہاں آکھیا جو انشورنس انڈسٹری سارے اسٹیک ہولڈرز دی شمولیت تے مبنی ہک جامع ملک گیر مشاورتی پروگرام شروع کرے۔ صدرمملکت فصلاں دی خرابی اتے آفات پاروں فصلاں دے نقصان دی صورت کساناں کوں پیداوار دے نقصان دے تحفظ کیتے پنجاب فصل بیمہ پروگرام شروع کرݨ تے پنجاب حکومت دی تعریف کیتی۔ اجلاس کوں ݙسیا ڳیا جو ورلڈ بینک دے قرض تے مبنی پائلٹ پروگرام دے ذریعے پنجاب دے 27 ضلعیاں کیتے 1.48 ملین کساناں کوں فصل دی خرابی دا بیمہ کیتا ڳئے۔
