اسلام آباد۔16مارچ (اے پی پی) وفاقی وزیر اطلاعات تے نشریات مریم اورنگزیب آکھیا جو عمران خان پاکستان دے تشخص کوں پامال کرݨ تے تل ڳے، انہاں دی گرفتاری نال حکومت دا کوئی تعلق کائنی، پولیس عدالتی حکم تے عمل کرویندی پی اے۔ عالمی نشریاتی ادارے ”سکائی نیوز“ نال ڳالھ مہاڑ کریندیں ہوئیں وفاقی وزیر اطلاعات آکھیا جو عمران خان قانون نال تعاون کرݨ دی بجائے مسلسل قانون شکنی کریندا پے، پولیس صرف عدالتی حکم تے عمل کرویندی پی اے، انہاں تے کرپشن دے مقدمے ہن، اتے انہاں کوں گرفتار کر تے عدالت اچ پیش کرݨے۔ انہاں آکھیا جو پولیس کنے کہیں قسم دا کوئی اسلحہ کائنی، پولیس عدالتی حکم تے عمل کراوݨ کیتے زمان پارک اچ موجود اے جتھ پولیس تے بماں نال مسلسل حملے تھیندے پن۔ ایں ویلھے تئیں ڈی آئی جی آپریشنز لاہور سمیت 65 پولیس اہلکار زخمی تھی ڳن۔ انہاں آکھیا جو عدالت ولوں جاری وارنٹ گرفتاری تے پولیس اسلحہ دے بغیر عمران خان کوں گرفتار کرݨ کیتے زمان پارک اچ موجود اے، عمران خان کوں ذمہ واری نال کم ڳھݨا چاہیدے۔ انہاں آکھیا جو عمران خان مسلسل کوڑ مریندا پے۔ عمران خان اکھیندن جو انہاں کوں سکیورٹی خطرات ہن اتے اوں ویلھے اکھیندن جو او سیاسی جلسے کرݨ کیتے تیار ہن، جئیں ویلھے عدالت اچ پیش تھیوݨ دا آکھیا ویندے تاں عمران خان سکیورٹی خطرات دا بہانہ ٻݨیندن۔
