اسلام آباد۔12جون(اے پی پی) صدر مملکت ڈاکٹر عارف علوی پاکستان دی سپیشل اولمپکس ٹیم کوں برلن سپیشل اولمپکس اچ شرکت تے مبارخ ݙیندے ہوئیں آکھیے 87 لوکاں تے مشتمل پاکستان دی اسپیشل اولمپکس ٹیم دا 11 کھیݙاں دے مقابلیں اچ حصہ گھنݨ باعثِ فخر اے ، امید کرینداں جو ساݙی ٹیم آپݨی بھرپور صلاحیتاں دا مظاہرہ کریسی ۔ پاکستان سپیشل اولمپکس ٹیم دے ناویں آپݨے سنھیے اچ صدر مملکت آکھیے پاکستان اسپیشل اولمپکس دی پوری ٹیم اتے انتظامیہ کوں وی مبارخ ݙینداں ، خوشی ہے جو ذہنی معذوری دے شکار لوک وی کھیݙاں اچ حصہ گھندے پئن ، پاکستان دی سپیشل اولمپکس ٹیم پہلے وی میڈل جت تے پاکستان دا ناں روشن کیتے۔ صدر مملکت آکھیے مثبت سرگرمیاں اچ خصوصی دی شمولیت ودھاوݨ دی لوڑھ اے ، ایں مقصد کیتے انہاں کوں صحت، تعلیم ، روزگار اتے کھیݙاں اچ آپݨا ناں پیدا کرݨ دا موقع ݙیوݨاں ہوسی ، انہاں آکھیے جو اساں پاکستان اچ ھک جامع اتے شمولیت تے مبنی معاشرے دی تشکیل چاہندوں ، خصوصی ٻالاں کوں عام ٻالاں دے نال سکول اچ تعلیم ݙیوݨ دے نال نال ہنر اتے روزگار دے مواقع ݙیوݨ دی لوڑھ اے ۔
