اسلام آباد۔3اکتوبر(اے پی پی) وفاقی وزیر منصوبہ بندی و ترقی پروفیسر احسن اقبال آکھیے جو ڈیٹا معلومات تے مبنی فیصلہ سازی دی بنیاد اے، اے ٻہوں ضروری اے جو اساں ایں توں مکمل طورتے فیدہ چاتے آپݨے ملک دی پوری صلاحیت کوں بروئے کار گھن آؤں ، ستویں مردم شماری دی بنیاد تے صوبائی سطح تے رپورٹاں جاری کیتیاں ونڄن ۔ اے ڳالھ انھاں آپݨی صدارت اچ پی بی ایس ڈیٹا فیسٹ 2024 دیاں تیاریاں سانڳے جائزہ اجلاس توں خطاب اچ آکھی ۔ اجلاس اچ سیکرٹری پلاننگ اویس منظور سمرا، چیف سٹیٹس ٹیشن ڈاکٹر نعیم ظفر اتے ممبر محمد سرور گوندل سودھے اہم افسراں شرکت کیتی ۔ اجلاس دا مقصد ڈیٹا فیسٹ 2024 دے ذریعے ڈیٹا دی اہمیت کوں اجاگر کرݨ تے ایں کوں ترقی سانڳے بروئے کار گھن آوݨ ہئی ۔ڈیٹا فیسٹ 2024 دا مقصد ڈیٹا خواندگی کوں ودھارا ݙیوݨ تے ڈیٹا دے اسٹریٹجک استعمال دے ذریعے جدت، انضمام اتے ترقی کوں ودھاوݨ اے ۔ وفاقی وزیر پروفیسر احسن اقبال ایں ڳالھ تے زور ݙتے جو ڈیٹا دے ذریعے فیصلہ سازی کوں تکڑا بݨاوݨ پاکستان دی ہر شعبے اچ ترقی سانڳے کلیدی حیثیت رکھیندے ۔ انہاں آکھیے ڈیٹا معلومات تے مبنی تے فیصلہ سازی دی بنیاد اے تے اے ٻہوں ضروری اے جو اساں ایں توں مکمل طور تے فیدہ چاتے آپݨے ملک دی پوڑی صلاحیت کوں بروئے کار گھن آؤں ۔ وفاقی وزیر آکھیے ستویں مردم شماری 2023، جیڑھی پہلی ڈیجیٹل مردم شماری دے، دی بنیاد تے صوبائی سطح تے رپورٹاں جاری کیتیاں ونڄن تاں جو مقامی سطح تے مباحثے دا ودھارا تھیوے تے پالیسی سازی دے عمل اچ بہتری گھن آئی ونڄ سڳے ، اے رپورٹاں صوبے دی سماجی و اقتصادی حالت کوں چنڳے طریقے نال سمجھݨ تے مؤثر پالیسی منصوبہ بندی سانڳے اہم ہوسن ۔پروفیسر احسن اقبال ایں ڳالھ تے زور ݙتے جو ایں ایونٹ اچ مصنوعی ذہانت (AI) دے ماہرین اتے جامعات دے اسٹیک ہولڈرز کوں رلایا ویسی ، ڈیٹا مصنوعی ذہانت دی بنیاد اے، اتے ایں فیسٹیول دے ذریعے اساں ڈیٹا اتے ٹیکنالوجی وچال خلا پُر کرݨ سانڳے ماہرین تے تعلیمی شعبے نال تعاون کریسوں تاں جو قومی ترقی سانڳے جدید حل ڳولیا ونڄ سڳے ۔ وفاقی وزیر ہدایت کیتی جو ڈیٹا فیسٹ 2024 اچ جامعات دے طلبا دی شمولیت یقینی بݨایا ونڄے تے انھاں سانڳے ڈیٹا مقابلیں دا اہتمام کیتا ویسی تاں جو او پی بی ایس دے ڈیٹا کوں تخلیقی طریقیں نال استعمال کرن۔ انہاں آکھیے اے اقدام نینگراں کوں مثبت سرگرمیاں اچ رلاوݨ تے انھاں دیاں صلاحیتاں بہتر بݨاوݨ اچ اہم کردار نبھیسی۔
